Job 13

1 ^a“Macho yangu yameona hili lote,
masikio yangu yamesikia na kulielewa.

2 ^bHayo mnayoyajua mimi pia ninayajua;
mimi si mtu duni kuliko ninyi.

3 ^cLakini ninayo shauku ya kuzungumza na Mwenyezi
na kuhojiana shauri langu na Mungu.

4 ^dNinyi, hata hivyo, hunipakaza uongo;
ninyi ni matabibu wasiofaa kitu, ninyi nyote!

5 ^eLaiti wote mngenyamaza kimya!
Kwa kuwa kwenu hilo lingekuwa hekima.

6 ^fSikieni sasa hoja yangu;
sikilizeni kusihi kwangu.

7 ^gJe, mtazungumza kwa uovu kwa niaba ya Mungu?
Je, mtazungumza kwa udanganyifu kwa niaba yake?

8 ^hMtamwonyesha upendeleo?
Mtamtetea Mungu kwenye mashtaka yake?

9 ⁱJe, ingekuwa vyema Mungu akiwahoji ninyi?
Je, mngeweza kumdanganya kama ambavyo mngeweza kuwadanganya wanadamu?

10 ^jHakika angewakemea
kama mkiwapendelea watu kwa siri.

11 ^kJe, huo ukuu wake haungewatisha ninyi?
Je, hofu yake isingewaangukia ninyi?

12 ^lManeno yenu ni mithali za majivu;
utetezi wenu ni ngome za udongo wa mfinyanzi.

13 ^m“Nyamazeni kimya nipate kusema;
kisha na yanipate yatakayonipata.

14 ⁿKwa nini nijiweke mwenyewe kwenye hatari
na kuyaweka maisha yangu mikononi mwangu?

15 ^oIngawa ataniua, bado nitamtumaini;
hakika nitazitetea njia zangu mbele zake.

16 ^pNaam, hili litanigeukia kuwa wokovu wangu,
kwa maana hakuna mtu asiyemcha Mungu
atakayethubutu kuja mbele yake!

17 ^qSikilizeni maneno yangu kwa makini;
nayo masikio yenu yaingize kile nisemacho.

18 ^rSasa kwamba nimekwisha kutayarisha mambo yangu,
ninajua mimi nitahesabiwa kuwa na haki.

19 ^sJe, kuna yeyote anayeweza kuleta mashtaka dhidi yangu?
Kama ndivyo, nitanyamaza kimya na nife.

20 “Ee Mungu, unijalie tu mimi haya mambo mawili,
nami sitajificha uso wako:

21 ^tOndoa mkono wako uwe mbali nami,
nawe uache kuniogofya kwa hofu zako kuu.

22 ^uNiite kwenye shauri nami nitajibu,
au niache niseme, nawe upate kujibu.

23 ^vNi makosa na dhambi ngapi nilizotenda?
Nionyeshe kosa langu na dhambi yangu.

24 ^wKwa nini kuuficha uso wako
na kunihesabu mimi kuwa adui yako?

25 ^xJe, utaliadhibu jani lipeperushwalo na upepo?
Je, utayasaka makapi makavu?

26 ^yKwa kuwa unaandika mambo machungu dhidi yangu
na kunifanya nizirithi dhambi za ujana wangu.

27 ^zUmeifunga miguu yangu kwenye pingu.
Unazichunga kwa makini njia zangu zote
kwa kutia alama kwenye nyayo za miguu yangu.

28 ^aa“Hivyo mwanadamu huangamia kama kitu kilichooza,
kama vazi lililoliwa na nondo.